COMUNIDADE

Última actualización (Versión): 15/11/2017 (V.01)

A primeira fase do proxecto rematará coa conformación da comunidade de aprendizaxe e práctica, que, aínda que se centrará nas veciñanzas afectadas, estará participada neste primeiro impulso polos seguintes axentes:

• Veciñanzas afectadas pola presión urbanística do PXOM da Coruña de 2013. O conxunto das persoas e comunidades para as que os desenvolvementos urbanísticos previstos no PXOM poden supoñer un problema directo, e que serán identificadas a partir dun estudo urbanístico e cartográfico, así como de traballo de campo.


• Organizacións sociais con experiencia na loita contra o urbanismo na Coruña metropolitana. Xunto ás veciñanzas afectadas, tamén se identificarán as comunidades e axentes locais con experiencia no enfrontamento a procesos relacionados co urbanismo, xa sexa na actualidade ou no pasado recente.


• Persoas expertas e con coñecementos técnicos sobre o territorio da Coruña desde as perspectivas social, legal e urbanística. Tres persoas expertas en cuestións relacionadas co territorio e o urbanismo da Coruña que poidan achegar coñecementos técnicos para resolver dúbidas e permitir imaxinar futuras liñas de traballo.


• Áreas do Concello da Coruña relacionadas co problema da presión urbanística sobre as persoas e os territorios. Seis concellarías ás que se interpelará para definir o posicionamento inicial da administración local na cuestión da presión urbanística.

Todas estas persoas e organizacións formarán parte deste primeiro impulso da comunidade a través da súa participación nas actividades públicas programadas no proxecto: tres roteiros e dúas xornadas de encontro.