Persoas expertas e con coñecementos técnicos sobre o territorio da Coruña desde as perspectivas social, legal e urbanística

Tres persoas invitadas polo seu coñecemento do territorio da Coruña e a súa vinculación a disciplinas e experiencias que poden achegar moito ao entendemento, tanto dos valores destes lugares, como do marco urbanístico, legal e social onde se formulan o seus futuros posibles.

Carlos Diz Reboredo Vilagarcía de Arousa, 1984

Licenciado en Socioloxía (Universidade da Coruña, 2007) e Doutor en Antropoloxía Social e Cultural (UDC, 2016), coa tese de doutoramento: "Políticas y tácticas del cuerpo: retablos de la ciudad activista".

Investigador en antropoloxía urbana, antropoloxía política e antropoloxía do corpo, estudando os activismos contemporáneos desde o entrecruzamento e a interconexión destes tres eixes principais.

Experiencia na realización de traballo de campo etnográfico en distintos países europeos e investigador visitante na Université de Bordeaux.

Entre as súas últimas publicacións pódense destacar en relación a este proxecto as seguintes: "La ciudad narrada: revuelta y semántica del conflicto urbano" (2017), "Miedo-ambiente: del urbanismo disciplinario, la sociedad de control y sus indignados" (2017), "Escuelas de democracia y 15M: participación, redes, ensayos" (2016), "Objetos tirados, objetos sagrados: reapropiación tecnológica de la bicicleta" (2016) ou "La imaginación de lo público: repensar la ciudad desde una acampada del 15M" (2013).

Participou en diferentes movementos, colectivos e centros sociais da cidade, desde a Masa Crítica ou o 15M, ata Stop Desafiuzamentos.

Invitado polo seu coñecemento e experiencia na análise de movementos e colectivos sociais (desde dentro e desde fóra, e a nivel local e global) xurdidos a partir dun obxectivo compartido, unha cuestión de gran relevancia para contextualizar e pensar desde os saberes acumulados a conformación da comunidade de aprendizaxe e práctica que aspira a impulsar este proxecto.

María José Domínguez Rivas A Coruña, 1978

Licenciada en Dereito (Universidade da Coruña, 2003) e Mestrado en Dereito de Familia (Universitat Autònoma de Barcelona, 2004).

Avogada autónoma e colaboradora en diferentes despachos na Coruña e Barcelona (2002-Actualidade). Traballo no Turno de Oficio (2008-actualidade).

Activista e colaboradora de Stop Desafiuzamentos A Coruña (2012-2015).

Avogada dun grupo de veciños e veciñas de San Vicenzo de Elviña afectados polo desenvolvemento do Plan Parcial "Parque Ofimático" (2013-actualidade).

Invitada pola súa experiencia na defensa das veciñanzas afectadas polo proceso urbanístico máis complexo e dramático dos desenvolvidos nas últimas décadas na Coruña, o caso do Plan Parcial "Parque Ofimático", o que lle permitirá compartir os seus coñecementos sobre os tempos, os instrumentos e os recursos necesarios que conlevan os procesos de loita contra o urbanismo vixente na Coruña desde a perspectiva legal.

Enrique Seoane Prado Oza dos Ríos, 1958

Arquitecto (Universidade da Coruña, 1984) e Doutor en Arquitectura (UDC, 2013), coa tese de doutoramento: "A ría como soporte da construcción da periferia urbana".

Persoal Docente e Investigador no Departamento de Proxectos Arquitectónicos, Urbanismo e Composición da UDC (1996-Actualidade) e membro do grupo de investigación Galicia Cidade e Territorio (GCeT) da UDC (2011-actualidade).

Entre as súas publicacións pódense destacar en relación a este proxecto as seguintes: "A construción da urbanidade complexa nas rías galegas" (2015), "A estructura pública da cidade" (2013), "A colonización da periferia urbana na costa das Mariñas" (2008) ou "A rehabilitación urbanística" (1991).

Arquitecto municipal no Concello da Coruña (1987-1992), no Concello de Oleiros (1992-2005) e no Concello de Santiago de Compostela (2005-actualidade).

Experiencia na redacción de todo tipo de plans e proxectos urbanísticos en múltiples municipios galegos (Cambre, Pontevedra, As Pontes, Laxe, Valdoviño, Culleredo, Betanzos, A Coruña ou Oleiros).

Invitado pola súa gran experiencia na práctica urbanística profesional, tanto desde o sector público como do privado, o que, xunto co seu labor docente e o seu profundo coñecemento do territorio e da historia urbana da Coruña, permitiralle abordar calquera dúbida arredor da escala, o contexto ou os instrumentos relacionados co problema da presión urbanística, así como sobre as posibles vías de traballo para o abordar.

A participación destas tres persoas está programada para a primeira xornada de encontro do proxecto, que se desenvolverá o venres 24 de novembro no Centro Cívico A Silva.

As tres persoas participarán nunha entrevista-debate público, así como nas mesas de traballo colectivo coas veciñanzas afectadas, nas que poderán achegar coñecementos técnicos para resolver dúbidas e permitir imaxinar futuras liñas de traballo para a comunidade de aprendizaxe e práctica.