Obradoiro desenvolvido como parte do X Encontro Cultura e Cidadanía, organizado polo Ministerio de Cultura en Santiago de Compostela, no que colaboraron a Asemblea Aberta do Matadoiro e a Escola Unitaria, e no que se traballou sobre un dos debates de actualidade en torno ao impacto do turismo nas cidades: a relación material das persoas co patrimonio cultural urbano.

Unha cuestión que se tratou desde dúas perspectivas: a da cidadanía residente, abordando os cambios nos modos de vivencia cotiá da cidade e do patrimonio inducidos pola masificación turística experimentada nas últimas décadas (como fenómeno global e como situación con características propias no caso de Santiago de Compostela); e a da cidadanía visitante, enfrontada cada vez máis a formas de control baseadas en conceptos como a "calidade visual" do patrimonio, unha idea que toma partido entre un suposto dereito á súa contemplación inmaculada e as prácticas turístico-populares cun carácter máis doméstico ou que implican un certo grao de territorialización urbana.