Proxecto de produción, difusión e debate público dun informe técnico sobre por que non se deben desaloxar e destruir dúas das vivendas da Pereiroa ameazadas polos plans urbanísticos para Elviña (A Coruña).

O traballo, realizado como parte do programa Expontáneas da Concellaría de Cultura, Deporte e Coñecemento do Concello da Coruña, materializouse mediante a súa exposición en formato gráfico nos centros institucionais onde se decidirá o futuro do ámbito (o Concello da Coruña, a Concellaría de Rexeneración Urbana e Dereito á Vivenda e a sede do Ministerio de Fomento na Coruña), rematando cunha xornada de actividades en Elviña na que se fixo un roteiro pola zona afectada polo plan parcial e a ampliación da avenida, unha presentación dos resultados da investigación realizada e un debate público coa veciñanza sobre as alternativas aos plans vixentes que contemplen a conservación das vivendas, as árbores e parte das trazas camiñeiras e catastrais ameazadas.